Blóðbað í Bagdad í dag

Hrina sprengju- og skotárása kostaði hátt á annað hundrað manns lífið í Írak í dag. Al-Qaida samtökin segjast vera ábyrg og hóta frekari aðgerðum. Það rigndi blóði í Írak í dag þegar hver sprengjan af annarri sprakk í höfuðborginni, Bagdad. Mannskæðasta árásin varð þegar hryðjuverkamaður lokkaði stóran hóp atvinnulausra sjíta að sendiferðabíl sínum með loforðum um atvinnu. Þegar mannfjöldi hafði safnast í kringum bílinn sprengdi hann hann í loft upp. Í bílnum voru yfir tvö hundruð kíló af sprengiefni og eitt hundrað og fjórtán manns biðu bana, auk þess sem hátt á annað hundrað særðust. Það var aðeins byrjunin því sprengjur hafa verið að springa í Bagdad í allan dag. Byssumenn hafa einnig látið til sín taka. Í grennd við höfuðborgina ráku menn í hermannabúningum sautján manns upp úr rúmum sínum í nótt og söfnuðu þeim saman á torgi bæjarins. Þar var fólkið allt myrt með skoti í höfuðið. Al-Qaida samtökin segja að þau hafi byrjað herferð sjálfsmorðsárása til þess að hefna fyrir árásir bandarískra og írakskra hersveita á bæinn Tal Afar í grennd við sýrlensku landamærin. Tal Afar er eitt af víghreiðrum skæruliðanna og þar hafa yfir tvö hundruð vígamenn verið drepnir undanfarna daga.