Mál Button frágengið

Ökuþórinn Jenson Button hefur nú formlega fengið sig lausan frá fyrirhuguðum samningi við lið Williams í Formúlu 1, en hann mun sem kunnugt er verða áfram hjá BAR eftir að honum snerist hugur um að fara frá liðinu. "Ég vil gjarnan nota þetta tækifæri og þakka forráðamönnum Williams fyrir að sýna mér skilning og leyfa mér að bakka út úr samningnum og mér þykir leitt hvað ég hef valdið mörgum hugarangri með þessum vandræðagangi," sagði Button á blaðamannafundi þar sem þetta var tilkynnt. Þó hann fái að bakka út úr samningnum sem hann hafði samþykkt á sínum tíma, verður það liði BAR ekki ódýrt að fá hann til baka, því talið er að Williams liðið muni fá í kring um tvo milljarða króna frá BAR fyrir að leysa Button undan samningnum.