Óvíst um fjölda dómara

Ekki liggur fyrir hverjir eða hversu margir munu skipa Hæstarétt þegar hann tekur afstöðu til úrskurðar Héraðsdóms Reykjavíkur um að vísa frá ákæru í Baugsmálinu. Ákæruvaldið kærði úrskurðinn til Hæstaréttar í síðustu viku og hafa öll málsgögn borist réttinum. Í kærumálum eru yfirleitt þrír dómarar í Hæstarétti en fimm þegar um áfrýjunarmál er að ræða. Sumir telja þó allt eins líklegt að fimm muni skipa dóminn að þessu sinni þar sem þrír dómarar skipuðu héraðsdóm, þó aðeins einn þeirra hafi kveðið upp úrskurðinn.