Byrjunarliðið liggur nokkuð ljóst fyrir

Sven-Göran Eriksson, þjálfari enska landsliðsins, hefur gefið sterkar vísbendingar um það hvernig hann mun stilla byrjunarliði sínu upp í æfingaleiknum við Argentínu í Genf á morgun.

Ef tekið er mið af orðum Svíans í dag má reikna með að Paul Robinson verði í markinu. Rio Ferdinand og John Terry verða miðverðir, Wayne Bridge og Luke Young verða bakverðir, Ledley King verður varnartengiliður, David Beckham verður á hægri kanti og Steven Gerrard á þeim vinstri. Frank Lampard verður sóknartengiliður og Wayne Rooney og Michael Owen verða í framlínunni.