David Duval í forystu í Japan

Kylfingurinn David Duval er mjög óvænt í forystu á Dunlop Phoenix mótinu í golfi sem fram fer í Japan um þessar mundir. Duval lék fyrsta hringinn í gær á 64 höggum, eða sex höggum undir pari. Hann hefur eins höggs forystu á Tiger Woods, sem hefur titil að verja á mótinu.

Duval var eitt sinn efstur á heimslista kylfinga, en hefur átt við mikil og erfið meiðsli að etja síðustu ár og því kemur þessi staða nokkuð á óvart. Duval hefur aðeins einu sinni komist í gegn um niðurskurð á PGA í ár, en hefur spilað eins og engill það sem af er í Japan.

"Það er vissulega gott að byrja mótið vel, en ég finn að ég á mjög langt í land með að ná mínu besta líkamlega," sagði Duval, sem hefur lítið geta æft vegna meiðsla á síðustu tveimur árum.