Ekki hrifinn af Glazer-fjölskyldunni

Franski snillngurinn Eric Cantona, sem gerði garðinn frægan með Manchester United á tíunda áratugnum og hefur oft lýst yfir áhuga sínum á að taka við knattspyrnustjórastöðu hjá félaginu, segir að hann myndi ekki koma nálægt félaginu á meðan það er í eigu Glazer-feðga.

"Ég mundi ekki taka við stöðu knattspyrnustjóra undir þeirra stjórn þó þeir borguðu mér 100 milljónir evra fyrir," sagði Cantona. "Ég held að þessi Glazer hafi ekki hundsvit á leiknum og hann er ekkert í samanburði við knattspyrnufélagið Manchester United. Ég elska félagið, en það kæmi aldrei til greina fyrir mig að starfa fyrir þessa menn. Manchester United er ekki eins og Chelsea og Roman Abramovic, United þarf ekki einn fjársterkan aðila, Manchester United er stærra og sterkara félag en nokkur maður í heiminum."