Næstu þrír mánuðir ráða miklu

Arsene Wenger, stjóri Arsenal, segir að næstu þrír mánuðir komi til með að hafa úrslitaþýðingu um það hvort Thierry Henry verði áfram hjá félaginu, en hann hefur sem kunnugt er neitað að ræða framlengingu á samningi sínum við Arsenal þangað til á næsta ári og margir slá því föstu að hann fari frá Englandi.

"Ég held að Henry elski þetta félag og vilji halda áfram að ná árangri hér, en næstu þrír mánuðir koma til með að ráða ansi miklu um það hvernig við stöndum. Við höfum skýr markmið hér hjá Arsenal, en til að samningar náist þurfa báðir aðilar að samþykkja það. Ég er ekki það vitlaus að halda því fram að við náum að vinna meistaradeildina, enda erum við enn í riðlakeppni. Í febrúar vitum við hinsvegar meira um framtíðina og möguleika okkar," sagði Wenger og vísaði þá í metnað Henry til að vinna meistaradeildina, en það er talin aðal ástæða þess að sá franski sé að hugsa sinn gang.