Skuldabréfaútgáfa erlendra aðila í íslenskum krónum nemur 10% af landsframleiðslu

Skuldabréfaútgáfa erlendra aðila í íslenskum krónum nemur nú 10% af landsframleiðslu. Deutsche Bank gaf í vikunni út skuldabréf í íslenskum krónum fyrir um einn milljarð króna en nokkurt hlé hafði verið á útgáfunni. Á seinni hluta næsta árs koma um fjörtíu milljarðar króna til greiðslu.

Erlendir aðilar hafa gefið út skuldabréf í íslenskum krónum fyrir hundrað og fimmtán milljarða króna en það er um 10% af landsframleiðslu. Meðallengd skuldabréfanna er 18 mánuðir.

Á seinni hluta næsta árs koma um 40 milljarðar eða um 4% af vergri landsframleiðslu til greiðslu. Á sama hátt og útgáfan hefur styrkt íslensku krónuna á þessu ári getur það veikt hana á næsta ári.

Edda Rós Karlsdóttir, forstöðumaður greiningardeildar Landsbankans, segir að það liggji nú þegar ljóst fyrir hvenær gjaldadagi bréfanna er á næsta ári. Það má því gera ráð fyrir að þeir sem séu að versla með krónur á gjaldeyrismarkaði taki strax tillit til þessa og verðleggi krónuna í takt við veikingaráhrif.

Skuldabréfaútgáfan hefur mikil áhrif á gengi krónunnar. Ef útgáfan heldur áfram mun krónan haldast sterk en ef hún minnkar þá gefur krónan eftir. Edda segir að þetta megi sjá af því að nú þegar nokkuð hlé hafi verið á útgáfunni þá hafi krónan veikst lítillega.