Ætlar ekki í máli við Mourinho

Knattspyrnustjórinn Arsene Wenger hjá Arsenal hefur dregið í land með hótanir sínar um að höfða meiðyrðamál á hendur portúgölskum kollega sínum hjá Chelsea, Jose Mourinho, fyrir að kalla sig "gluggagægir" á dögunum.

Grunnt hefur verið á því góða milli þeirra tveggja lengi og Wenger sagðist fyrir tveimur vikum vera að hugsa sér að fara í mál við Mourinho vegna niðrandi ummæla hans um sig og lið sitt. Í viðtali við Evening Standard í dag, viðurkennir Wenger þó að hann ætli að grafa stríðsöxina og einbeita sér að öðru en deilum við kollega sinn.

"Ég hef ekki skipt um skoðun varðandi málið í heild, en ég hef engu að síður ákveðið að fara ekki með þetta lengra. Ég þarf að einbeita mér að því sem skiptir meira máli fyrir mig og Arsenal," sagði Wenger.