Redknapp vill ná stigi

Harry Redknapp, nýráðinn stjóri Portsmouth í ensku úrvalsdeildinni, segir að stefnan sé að ná í eitt stig þegar lið hans sækir Tottenham Hotspurs heim í leik kvöldsins. Þetta verður fyrsti leikur liðsins undir stjórn Redknapp, en liðin eru á mjög ólíku róli í deildinni.

"Ég myndi þiggja að hafa átta af varamönnum þeirra í byrjunarliði mínu. Þeir eru með það sterkan hóp að þeir geta leyft sér að vera með mann eins og Jermain Defoe á varamannabekknum. Ég held að Tottenham verði á topp fimm í deildinni í vetur og ég væri feginn ef við næðum markalausu jafntefli á móti þeim," sagði Redknapp, sem á mikið verk fyrir höndum að halda liði Portsmouth í úrvalsdeildinni.