Tvíframlengt hjá Memphis og Detroit

Detroit Pistons vann enn einn leikinn í NBA deildinni í nótt þegar liðið vann mjög nauman sigur á Memphis Grizzlies í tvöfaldri framlengingu 106-104. Chauncey Billups skoraði 30 stig fyrir Detroit og gaf 9 stoðsendingar, en Pau Gazol skoraði 32 stig og hirti 13 fráköst fyrir Memphis.

Toronto vann mikilvægan útisigur á Orlando 92-90, þar sem Mo Peterson skoraði sigurkörfu Toronto í blálokin, en hann skoraði 19 stig í leiknum eins og Chris Bosh. Hjá Orlando var Steve Francis stigahæstur með 20 stig.

Boston sigraði Golden State 109-98. Ricky Davis skoraði 21 stig fyrir Boston, en Troy Murphy skoraði 27 stig og hirti 12 fráköst fyrir Golden State.

Charlotte lagði Sacramento í framlengingu 106-103. Pirmos Brezec skoraði 26 stig fyrir Charlotte, en Shareef Abdur-Rahim var með 32 hjá Sacramento.

Loks vann Seattle góðan sigur á Washington 111-101. Gilbert Arenas skoraði 30 stig fyrir Washington og Rashard Lewis var einnig með 30 stig hjá Seattle.