Mér verður ekki sagt að þegja

Jose Mourinho hefur lýst því yfir að honum verði ekki sagt að þegja og segist muni halda áfram að tjá skoðanir sínar. Þetta segir hann á meðan hann bíður eftir úrskurði aganefndar enska knattspyrnusambandsins vegna ummæla hans um leikmann Wigan, sem hann kallaði svindlara í leik Wigan og Chelsea á dögunum.

"Allir hafa rétt á sínum skoðunum og ég tel mig hafa rétt á því að viðra mínar skoðanir á Englandi. Það er mikilvægt að hafa skoðanir á hlutunum og að vera ekki hræddur um að láta þær í ljós þó það mæti gagnrýni," sagði Portúgalinn.