Boateng verður frá í átta vikur

Hollenski miðjumaðurinn George Boateng hjá Middlesbrough verður frá keppni í átta vikur vegna ökklameiðsla sem hann hlaut í bikarleiknum gegn Blackburn í vikunni. Þetta er gríðarlegt áfall fyrir lið Boro, því Boateng er lykilmaður í öllu miðjuspili liðsins.

"Þetta er okkur að sjálfssögðu gríðarlegt áfall, því Boateng er mikilvægur hlekkur í liði okkar. Nú verða aðrir bara að koma inn og nýta sitt tækifæri í fjarveru hans," sagði Steve McClaren knattspyrnustjóri liðsins, sem hefur þurft að horfa á eftir þeim Boateng og Gaizka Mendieta í meiðsli til skiptis undanfarin ár og það hefur meðal annars orðið til þess að liðið hefur oft valdið vonbrigðum í deildinni.