Lítið jólaskap í Kobe og Shaq

Annað árið í röð mættust fyrrum félagarnir Kobe Bryant og Shaquille O´Neal að kvöldi jóladags með liðum sínum LA Lakers og Miami Heat. Shaq og félagar höfðu betur í gærkvöldi eins og í fyrra 97-92. Þá mættust liðin sem léku til úrslita í fyrra, Detroit Pistons og San Antonio Spurs í Detroit, þar sem heimamenn höfðu betur 85-70.

Kobe Bryant var stigahæstur í liði LA Lakers gegn Miami og skoraði 37 stig, en hann hitti ekki vel í leiknum og misnotaði þriggja stiga skot í lokin sem hefði geta jafnað leikinn fyrir Lakers. Gary Payton skoraði 21 stig fyriri Miami gegn sínum gömlu félögum og Shaquille O´Neal skoraði 18 stig og reif niður 17 fráköst.

Chauncey Billups var stigahæstur í liði Detroit gegn San Antonio með 20 stig, en Ben Wallace skoraði 10 stig og hirti 21 frákast. Tony Parker skoraði 19 stig og Tim Duncan var með 18 stig og 11 fráköst fyrir San Antonio, sem skoraði aðeins 8 stig í fyrsta leikhlutanum og það er það minnsta í sögu félagsins.