Liðið er búið að jafna sig á Meistaradeildinni

Alex Ferguson, stjóri Manchester United, segir að liðið sé búið að jafna sig eftir áfallið að detta út úr Meistaradeild Evrópu og er mjög ánægður með hvernig leikmenn hans hafa brugðist við því í deildinni að undanförnu.

"Tapið fyrir Benfica var okkur reiðarslag og við áttum alls ekki von á að hlutirnir færu svona eins og þeir gerðu í Evrópukeppninni. Leikmenn mínir eru ekki hrifnir af því að tapa, en þeir hafa brugðist vel við þessu í úrvalsdeildinni og liðið er á góðu skriði þessa dagana. Það er að vísu svekkjandi að Chelsea skuli aldrei tapa stigum, en ef það gerist, viljum við vera fast á hæla þeim," sagði Ferguson.