Shaq í súmóglímu

Pat Riley, forseti og þjálfari Miami Heat, íhugar nú alvarlega að ráða til sín súmóglímumenn til að kljást við tröllið Shaquille O´Neal á æfingum, því honum þykir rétt að búa O´Neal betur undir þau slagsmál sem hann lendir í daglega í NBA deildinni.

Þegar náttúruundur eins og Shaquille O´Neal eru annarsvegar, breytast sjálfkrafa áherslur í dómgæslu og komast varnarmenn yfirleitt upp með mikil fantabrögð til að verjast tröllinu, sem aldrei yrðu leyfð gegn "venjulegum" leikmönnum.

"Ef Shaq mundi taka eins á miðherjum deildarinnar og þeir taka á honum, tæki það hann aðeins nokkrar mínútur að vera sendur í bað og menn mundu fljúga af honum eins og flugur af mykjuskán," sagði Pat Riley.

O´Neal er 213 cm á hæð og vegur um þessar mundir rúm 165 kíló, sem er svipað og japanskir súmóglímumenn vega að meðaltali.