45 stig frá Bryant dugðu skammt

Kobe Bryant skoraði 45 stig fyrir LA Lakers í nótt þegar liðið tapaði naumlega 100-99 fyrir Memphis í framlengingu á heimavelli sínum. Damon Stoudamire skoraði 25 stig og gaf 9 stoðsendingar fyrir Memphis.

Orlando sigraði New York 105-95. Eddy Curry var með 29 stig og 9 fráköst hjá New York, en Grant Hill skoraði 26 stig fyrir Orlando.

Phoenix vann sigur á Washington 104-99. Shawn Marion var með 28 stig fyrir Phoenix, en Caron Butler skoraði 22 fyrir Washington.

Toronto hafði betur gegn Atlanta í botnslagnum 108-102. Al Harrington var með 25 stig hjá Atlanta, en Mike James skoraði 28 stig og gaf 9 stoðsendingar hjá Toronto.

Charlotte vann fimmta sigur sinn í sjö leikjum þegar liðið skellti Chicago Bulls 93-80. Luol Deng var með 18 stig hjá Chicago, en Melvin Ely skoraði 20 stig hjá Charlotte.

New Orleans vann nauman sigur á Houston á heimavelli sínum í Oklahoma 92-90. Tracy McGrady var allt í öllu hjá Houston með 38 stig, en J.R. Smith skoraði 16 stig fyrir New Orleans, sem tryggði sigurinn með körfu tæpum tveimur sekúndum fyrir leikslok.

Minnesota sigraði Seattle 108-95. Wally Szczerbiak skoraði 30 stig fyrir Minnesota, en Ray Allen skoraði 24 fyrir Seattle.

Portland sigraði Philadelphia á heimavelli sínum 95-91. Allen Iverson skoraði 28 stig fyrir Philadelphia og Zach Randolph var með 28 stig og 14 fráköst hjá Portland, sem hafði þarna betur gegn fyrrum þjálfara sínum Mo Cheeks og hans mönnum í Philadelphia.

Golden State vann nauman sigur á Boston 111-109. Jason Richardson skoraði 36 stig fyrir Golden State og Paul Pierce var með 28 stig og 12 fráköst hjá Boston.