Grænlendingar teknir á sundi

Lögreglan í Reykjavík hafði afskipti af fjórum Grænlendingum sem svömluðu um í Reykjavíkurtjörn um klukkan þrjú í fyrrinótt. Mennirnir höfðu verið í og við tjörnina í skamma stund þegar lögreglan kom á vettvang. Lögreglan keyrði mennina á gistiheimili í grenndinni þar sem þeir lögðu sig eftir sundið.

Dyggur lesandi Fréttablaðsins, sem fylgst hafði með ferðum mannanna út um gluggann hjá sér, hringdi inn á Fréttablaðið og lýsti því fyrir blaðamanni sem fyrir augu bar. Frásögn hans samræmdist ekki upplýsingum sem fengust hjá lögreglu, þar sem hann taldi sig hafa séð fimm menn taka endur af tjörninni ófrjálsri hendi. Svo reyndist ekki vera.