Játar þjófnað á þremur bílum

Karlmaður á þrítugsaldri hefur játað stuld á þremur bílum á mánaðartímabili undir lok síðasta árs. Maðurinn, sem átti Nissan Patrol-bifreið fyrir, stal meðal annars tveimur Patrol-bílum til viðbótar, gerði breytingu á öðrum þeirra til þess að hann líktist þeim sem hann átti fyrir, setti númer síns bíls á þann stolna og notaði hann í einn mánuð. Þessa iðju stundaði hann í bílskúr heima hjá sér.

Hann tók síðan ýmsan búnað úr þriðja Patrol-bílnum, eftir að hafa stórskemmt hann með útafakstri, og setti í hinn stolna bílinn. Þá setti hann litaða olíu á annan stolna Patrol-bílinn og stal enn einum bíl annarrar tegundar og notaði í tvo mánuði.

Málið var dómtekið í Héraðsdómi Suðurlands í gær.