Engan vökva í handfarangri

Á Keflavíkurflugvelli er enn strangt eftirlit með farþegum á leið til Bandaríkjanna. Leitað er í handfarangri allra farþega, en blátt bann við handfarangri er ekki í gildi. Stranglega bannað er að ferðast með vökva í handfarangri á leið til Bandaríkjanna, en enn er heimilt að ferðast með rafeindabúnað til dægrastyttingar.

Farþegum gefst kostur á að koma vökva sem þeir kaupa í fríhöfninni með í flugið, með því að afhenda vökvann vopnaleitarmönnum sem koma honum fyrir ásamt almennum farangri í lest flugvélarinnar. Leitin fer fram á sérstöku svæði í suðurhluta flugstöðvarinnar. Þessar ráðstafanir falla ekki inn í venjubundna vinnuferla og því þurfum við að kalla út átján manns aukalega til að koma í veg fyrir tafir, segir Jóhann R. Benediktsson, sýslumaður á Keflavíkurflugvelli. Að sögn Jóhanns er alls óvíst hversu lengi eftirlitið verður með þessum hætti.

Fríhöfn á jarðhæð í suðurhluta Leifsstöðvar hefur verið lokað vegna þessa. Þegar fólkið er þangað komið er það búið að fara í síðustu vopnaleitina og því var ákveðið að loka versluninni, segir Höskuldur Ásgeirsson, framkvæmdastjóri Fríhafnarinnar.

Enn eru engar sérstakar öryggisráðstafanir vegna flugs til Englands. Þó skal bent á að farþegar sem millilenda í Bretlandi á leið frá Íslandi geta átt von á því að vera stöðvaðir með handfarangur.