Skrifar fyrir virt vefrit

Marga netverja rak í rogastans þegar þeir sáu nafn Atla Bollasonar skrifað undir umfjöllun um tónleika Sufjan Stevens í Fríkirkjunni á heimasíðunni Pitchforkmedia.com, sem er einhver sú virtasta í bransanum.

„Ég og Leó Stefánsson félagi minn rákumst á útsendara Pitchfork á Airwaves og það fór bara nokkuð vel á með okkur. Við bentum honum á áhugaverð bönd og Leó endaði á því að taka myndir fyrir hátíðina sem birtust á Pitchfork.

Síðan hefur ritstjórnin verið í sambandi þegar eitthvað spennandi gerist hér á landi og við höfum reynt að liðsinna þeim eftir fremsta megni,“ segir Atli. „Jákvæð umfjöllun á Pitchfork þýðir að bandið þitt er orðið að stórstjörnu í indí-heiminum. Bönd eins og Arcade Fire og Interpol væru varla neitt án síðunnar,“ segir Atli um vinsældir og vægi síðunnar en tekur það líka fram að mörgum þyki Pitchfork vera hroka- og fordómafullur miðill. Atli, sem viðurkennir að vera mikill aðdáandi síðunnar, segist ekki viss um hvort hann muni skrifa meira, þótt hann sé vissulega til.

„Það er dálítið spennandi að hundrað þúsund manns hér og þar um heiminn muni taka mark á því sem mér fannst, einhver völd sem fylgja því.“ Atli segir að próförk Pitchfork hafi þó lítillega poppað upp á enskukunnáttu sína í greininni, „Ég veit ekki einu sinni hvað „austere“ þýðir.“