Myndlistin fer á vefinn

Breski safnarinn og auðkýfingurinn Charles Saatchi rekur vef fyrir unga myndlistarmenn í tengslum við safn sitt í London: www.saatchi-gallery.co.uk/stuart. Þangað koma nú þrjár milljónir innlita á degi hverjum. Á vef safnsins er slóð fyrir listamenn, Your Gallery, og eru ríflega 25 þúsund listamenn með verk sín skráð þar og til sölu.

Að auki hefur verið opnuð ofangreind slóð sérstaklega fyrir ungt listafólk – Stuart. Sex þúsund skráðra þátttakaenda á vefum safnsins eru búsettir í Bretlandi og annað eins í Bandaríkjunum. Restin dreifist víða um heim.

Charles Saatchi, auglýsingakóngurinn breski, er reyndar kunnur af því að gera fátt nema hann sjái sér fjárhgaslegan ávinning í því. Vefurinn hefur gerbylt aðstöðu myndlistarmanna um allan heim til að selja list sína, en þar eiga einkum hlut sérbúnir vefir fyrir safnara. Vefur Saatchi er að því leiti óvenjulegur að þangað hlaða listamenn verkum sínum og selja beint. Fullyrt er að vefinn sæki reglulega um sex miljónir manna og hann verði brátt að gríðarlegu afli í myndlistarheiminum og bylti aðstöðu miðlara. Þar geta safnstjórar og sýningarstjórar tekið púlsinn dag hvern. Þetta þýðir að milliliður gallerí-eigenda rýrist.

Hugmyndin varð til þegar safnarinn varð að loka sýningarsal sínum í County Hall í London í fyrra en hann opnar nýjan í Chelsea á sumri komanda. Vefsíðan hrundi í þriðju viku desember undan þunga sex miljóna heimsókna að því talið er á einum degi. Þá komu fimmhundruð nýjir sýningaraðilar inn daglega. Spjallsvæði eru í tengslum við síðuna þar sem listamenn og listunnendur geta rætt málin - verð og gildi verkanna.

Gríðarleg hækkun hefur orðið á verkum myndlistarmanna á hinum stóru mörkuðum og litið er á kaup á myndlist sem framtíðarfjárfestingu.