Hefur áhuga á Pavel Nedved

Jose Mourinho, stjóri Chelsea, viðurkennir að hann hafi lengi verið aðdáandi tékkneska landsliðsmannsins Pavel Nedved hjá Juventus, en segist búast við því að hann klári ferilinn hjá ítalska liðinu.

"Ég hef lengi haft áhuga á að fá Nedved, en hann vill ekki fara frá Juventus. Hann er að mínu mati einn allra besti knattspyrnumaður í heiminum þrátt fyrir að vera orðinn 33 ára gamall. Ég held að hann muni engu að síður klára ferilinn hjá Juventus," sagði Mourinho, sem sjálfur er með tvo Tékka í liði sínum sem hann hefur miklar mætur á. Annar þeirra er Petr Cech markvörður.

"Hvað finnst mér um Petr Cech? Hann er fastamaður í mínu liði - það segir sína sögu," sagði Mourinho af sinni alkunnu snilld. "Hann er frábær markvörður og þar að auki mjög ungur, svo hann á eftir að bæta sig mikið ennþá."