Hvetja Íraka til að mynda starfhæfa ríkisstjórn

Condolezza Rice, utanríkisráðherra Bandaríkjanna, og Jack Straw, utanríkisráðherra Bretlands, hvöttu Íraka til þess að mynda starfhæfa ríkisstjórn sem fyrst en þau eru nú stödd í Írak. Andstaða gegn Íraksstríðinu magnast í Bandaríkjunum.

Eftir tveggja daga heimsókn Rice til Bretlands komu Rice og Straw í óvænta heimsókn til Íraks í gærmorgun. Þar hafa þau fundað með bæði með Jalal Talabani, forseta landsins, og Ibrahim al-Jaafari, forsætisráðherra Íraks.

Erfiðlega hefur gengið að mynda starfhæfa ríkisstjórn í landinu síðan þingkosningar fóru fram í desember. Kúrdar og súnníar vilja að al-Jaafari forsætisráðherra víki og segja mikilvægt að sátt náist um næsta forsætisráðherra. Rice sagði í dag að miklvægt væri að næsti forsætisráðherra Íraks sé sterkur leiðtogi sem sameinað gæti þjóðina. Heimsókn þeirra Rice og Straw er ætlað að þrýsta á Íraka að mynda þjóðstjórn sem fyrst. Þau lögðu þó áherslu á að það væru Írakar einir sem gætu valið sér nýjan forsætisráðherra.

Á meðan magnast andstaða við Íraksstríðið í Bandaríkjunum. Íbúar í Winsconsin fylki munu í vikunni geta kosið um stríðið í kosningu sem skipulögð er af andstæðingum Íraksstríðsins. Með söfnun undirrskrifta tókst þeim að fá kosningu í geng á því hvort að bandarískir hermenn eigi að yfirgefa Írak. Kosningin hefur ekkert lagalegt gildi en niðurstaðan getur gefið mynd af því hver hin raunverulega andstaða við Íraksstríðið er í Bandaríkjunum.