Atvinna, fjölskyldu- og skipulagsmál í forgrunni

L-listinn, listi fólksins sem býður fram í 3. sinn í sveitarstjórnarkosningunum 27. maí næstkomandi kynnti stefnuskrá sína í morgun undir yfirskriftinni "Afl fyrir Akureyri til 2010". Þar er áherslan meðal annars lögð á fjölskylduvænni bæ, eflingu skóla, fría leikskóla og almenningssamgöngur og þá vill L-listinn að bæjarstjóri Akureyrar verði ráðinn á faglegum forsendum.

L-listinn, listi fólksins, bauð fyrst fram í bæjarstjórnarkosningum á Akureyri árið 1998 og fékk einn mann kjörinn. Árið 2002 bætti hann við sig manni og á nú tvo fulltrúa í bæjarstjórn. Nú er stefnan sett á 3 bæjarfulltrúa.

L-listinn er hópur áhugafólks um velferð Akureyrar og íbúa hennar og er opinn öllum, óháð stjórnmálaskoðun.

Stefnuskrá L-listans, lista fólksins fyrir næsta kjörtímabil er unnin eftir þeim markmiðum sem flokksmenn hafa sett sér, eftir spurningunni: "Hvernig viljum við að Akureyri verði við lok kjörtímabils, árið 2010?"

Í stefnuskrá L-listans segir m.a.; "Við viljum að Akureyri verði enn betri bær og til þess leggjum við áherslu á meðal annars eftirfarandi mál:

• Bætt skipulag innanbæjarsamgangna;

• Ávallt nægar byggingarlóðir jafnt fyrir íbúðir sem atvinnustarfsemi;

• Ljúka skipulagi háskólasvæðis;

• Akureyri sé fjölskylduvænn bær;

• Tryggt aðgengi að daggæslu, skólum, heilsugæslu og allri þjónustu;

• Frítt í strætó!

• Allar barnafjölskyldur eigi kost á leikskólaplássi - án skólagjalda;

• Einkavæðum ekki skólana;

• Leik- og grunnskólar: Heitur matur í hádeginu, eldaður á Akureyri!

• Háskólinn á Akureyri njóti öflugs stuðnings;

• Orkuháskólinn er boðinn velkominn!

• Sorpmálin eru bæjarskömm, þeim verður komið í það horf að sómi verði af;

• Glerárgil og strandlengjan meðfram bænum verða gerð að hreinu og vistvænu útivistarsvæði;

• Vinnum markvist að stuðningi við atvinnulíf í bænum og gerum Akureyri fýsilegan kost fyrir ný fyrirtæki;

• Vinnum markvisst að markaðssetningu Akureyrar;

• Þyrlubjörgunarsveit verði staðsett á Akureyrarflugvelli;

• Byggjum upp á KA - og Þórssvæðinu.

• Byggjum akstursíþróttaaðstöðu við Glerá;

• Tryggjum fimleikafólki aðstöðu sem jafnast á við besta sem gerist;

• Reisum reiðhöll á hesthúsasvæðinu við Hlíðarholt;

• Listahátíð unga fólksins verði árlegur viðburður;

• Stóraukum fjármagn til vímuvarna og forvarna;

• Vinnum markvisst áfram að uppbyggingu hjúkrunarheimila fyrir þá sem þess þurfa og búum þeim heimilislegt umhverfi og aðstöðu til að taka á móti fjölskyldum sínum með reisn;

• Við teljum að málefni fatlaðra sé betur borgið hjá sveitarfélaginu en ríki;

• Algjört jafnrétti kynjanna á að vera ófrávíkjanleg regla í allri stjórnsýslu Akureyrarbæjar;

• Áfram verði unnið að verkefninu „sjálfbært samfélag í Hrísey";

• Heilsugæsla Hríseyinga verði færð undir Heilsugæslustöðina á Akureyri;

• Við viljum efla starfsemi Fjórðungssjúkrahússins sem hátæknisjúkrahús á landsbyggðinni;

• Við viljum að bæjarstjórinn, það er framkvæmdastjóri fyrirtækisins Akureyrarbæjar, verði ráðinn á faglegum forsendum;

• Auðveldum bæjarbúum að fylgjast með hvað kjörnir fulltrúar þeirra eru að gera, hvernig bæjarstjórn vinnur.