Næsta keppni gæti markað nýtt upphaf

Michael Schumacher segist vera mjög ánægður með þróun Ferrari-bílsins á síðustu vikum og á von á því að breski kappaksturinn um næstu helgi marki nýtt upphaf fyrir liðið.

Schumacher hefur nú hrist af sér fárið í kring um Mónakó-kappaksturinn á dögunum og er mjög bjartsýnn á gengi síns liðs á næstunni, þó hann sé nú 21 stigi á eftir heimsmeistaranum Fernando Alonso í stigatöflunni.

"Ég verð að segja að mér líst mjög vel á framhaldið og vinna liðsins er að skila góðu. Ég hef trú á því að breski kappaksturinn gæti orðið upphafið að góðu tímabili fyrir okkur. Við ættum að verða í stakk búnir til að keppa um sigurinn á Silverstone, því þetta er alltaf spurning um það hve vel liðið nær að þróa bílinn yfir tímabilið og sú vinna hefur verið að skila góðu fyrir okkur undanfarið," sagði Schumacher.