Hollendingar lögðu Serba

Hollendingar byrja heimsmeistaramótið í knattspyrnu ágætlega og í dag vann liðið opnunarleik sinn í hinum magnaða c-riðli gegn Serbum og Svartfellingum 1-0. Það var hinn magnaði Arjen Robben sem skoraði sigurmark liðsins á 17. mínútu. Robben var að öðrum ólöstuðum besti maður vallarins og fékk að leika lausum hala á vængnum hjá Hollendingum.

Fyrri hálfleikurinn var algjörlega eign hollenska liðsins, en þó Serbum hafi vaxið ásmegin í þeim síðari, héldu þeir appelsínugulu velli og eru komnir í ágæt mál í riðlinum eins og Argentínumenn.