Stjóri McLaren ánægður með Alonso

Martin Whitmarsh, stjóri McLaren-liðsins í Formúlu 1, segist gríðarlega ánægður með frábæran árangur heimsmeistarans undir merkjum Renault það sem af er tímabili, en Alonso hefur sem kunnugt er gert samning við McLaren frá og með næsta keppnistímabili.

"Ég held svei mér að hann sé betri ökumaður núna en þegar hann samdi við okkur í desember og við erum því eðlilega í skýjunum yfir frábærum árangri hans. Það er ótrúlegt að fylgjast með því hvað hann vex og þroskast sem ökumaður. Við höfum auðvitað blendnar tilfinningar í hans garð núna þegar hann er enn að keyra fyrir annað lið, en maður getur ekki annað en tekið ofan fyrir drengnum. Hann hefur verið frábærlega stöðugur það sem af er tímabili og við vonum auðvitað að hann haldi þessu frábæra gengi áfram þegar hann kemur yfir til okkar," sagði Whitmarsh.