Jaliesky Garcia úr leik í 6 mánuði

Íslenski landsliðsmaðurinn Jaliesky Garcia leikur ekki með íslenska landsliðinu á HM í Þýskalandi í byrjun næsta árs eftir að hann sleit krossbönd í hné á æfingu með liði sínu Göppingen á föstudag og verður hann frá keppni í að minnsta kosti hálft ár.

Þetta er mikið áfall fyrir íslenska landsliðið sem ætlar sér stóra hluti á HM í janúar, en það kemur væntanlega í hlut Arnórs Atlasonar að leysa Garcia af hólmi líkt og á síðasta stórmóti. Garcia fer í aðgerð á miðvikudag.

Einnig er áhyggjuefni fyrir landsliðið að Ólafur Stefánsson hefur átt við meiðsli að stríða í hásin og hefur einnig verið að glíma við meiðsli á öxl. Þá er Snorri Steinn Guðjónsson meiddur á hné um þessar mundir og hefur enn ekki fengið sig góðan af þeim meiðslum.