Aldingarðurinn

Á mánudaginn, 13. nóvember, kemur út hjá Hjá Vöku Helgafelli Aldingarðurinn eftir Ólaf Jóhann Ólafsson. Aldingarðurinn kemur út samtímis í Bandaríkjunum og á Íslandi.

Ástin og tíminn, tvö sterkustu öflin í mannlegri tilveru, eru meginstefin í þessari seiðmögnuðu bók Ólafs Jóhanns Ólafssonar sem inniheldur tólf smásögur. Hún fylgir árhringnum, hver frásögn ber nafn eins mánaðanna og fléttast þær þannig saman bæði í efni og byggingu.

Þetta er bók um tryggð og svik, hamingju og sorg, lævíslegar grunsemdir og grunsamlegar ímyndanir, ástríðufulla þrá og leik að eldi ... Aldingarðurinn er áhrifamikið bókmenntaverk sem fjallar um dýpstu þrá hverrar manneskju; þrána eftir ást, en jafnframt margrætt eðli ástarinnar og sannra tilfinninga. Sjaldan hefur Ólafi Jóhanni tekist eins vel upp og í þessari bók sem á ugglaust eftir að gleðja nýja sem gamla lesendur Ólafs og auka enn orstír hans sem rithöfundar.

Tuttugu ár eru liðin síðan Ólafur Jóhann sendi frá sér sína fyrstu bók, smásagnasafnið Níu lykla, sem hlaut góðar viðtökur. Síðan hefur hann fest sig í sessi sem einn vinsælasti sagnamaður þjóðarinnar, með verkum eins og Slóð fiðrildanna og Höll minninganna.