Fjögurra klukkustunda kynlífsmyndband af Britney Spears

Ótti ríkir í herbúðum Britney Spears eftir að upplýst var að eiginmaður hennar Kevin Federline, hefur undir höndum fjögurra klukkustunda myndband af þeim hjónum í villtum ástarleikjum.

Breska blaðið News of The World segir að Federline hafi þegar verið boðnir milljarðar króna fyrir myndbandið. Vinur Federlines segir að myndirnar hafi verið teknar á hveitibrauðsdögum hjónanna þegar þau gátu varla sleppt hendinni hvort af öðru. Þau hafi ekkert annað gert en elskast, og tefla stöku skák. Þau hafi hreinlega verið óseðjandi.

Britney er sögð óttast að myndbandið eyðileggi heilbrigða ímynd sína, ef það verði gert opinbert. Hún eigi úr vöndu að ráða í samningum við Federline, sem heimtar af henni tvo milljarða króna og forræði yfir börnum þeirra tveimur.