Dularfulla löggan

Þýsku lögregluþjónarnir héldu að þá væri að dreyma, þegar vel merktur amerískur lögreglubíll renndi fram úr þeim á hraðbrautinni. Við stýrið sat amerískur lögregluþjónn, með kaskeyti og Smith&Wesson skammbyssu.

Þeim þótti rétt að kanna málið og stöðvuðu ameríkanann. Hann var reyndar þýskur bílasafnari sem var að fara að selja þennan þrjátíu ára gamla ameríska lögreglubíl, í næstu borg. Hann hafði farið í einkennisbúninginn til þess að skapa stemmingu, og skammbyssan var eftirlíking.

Þýsku löggurnar fylgdu þessum starfsbróður sínum í næstu fataverslun, þar sem hann gat keypt sér gallabuxur og bol í staðinn fyrir einkennisbúninginn. Þeir gerðu leikfangabyssuna upptæka og svo fékk hann að halda áfram. Reyndar ekki alveg eins upplitsdjarfur og þegar hann lagði af stað að heiman.