Myrti fimm veiðimenn

Grískur sauðfjárbóndi hefur viðurkennt að hafa skotið fimm veiðimenn til bana sem farið höfðu í óleyfi um landareign hans. Lík fimmenninganna fundust á laugardaginn á akri nærri bænum Agrinio í vesturhluta landsins. Þeir voru á aldrinum 17 til 33 ára og voru allir náskyldir. Einn mannanna náði að hringja úr farsíma í föður sinn meðan á átökunum stóð en símtalið rofnaði eftir örstutta stund. Mikil öryggisgæsla var við jarðarför þeirra í dag en lögregla óttast að grimmilega verði hefnt fyrir morðin.