Gat ekki varið sig sökum ölvunar

Maður um tvítugt var í gær dæmdur í Héraðsdómi Austurlands í sextíu daga skilorðsbundið fangelsi fyrir líkamsárás. Maðurinn réðst ásamt konu á þrítugsaldri á karlmann við heimahús á Höfn í Hornafirði í janúar á þessu ári.

Konan játaði sök en hún og maðurinn slógu fórnarlambið nokkrum hnefahöggum í andlitið og brutu hönd hans með því að skella á hana útidyrahurð. Dómurinn taldi árásina tilefnislausa og fólskulega en fórnarlambið var mjög drukkið og átti því erfitt með að verja hendur sínar.