Kemur The Police saman aftur?

Orðrómur er uppi um að hljómsveitin The Police ætli að koma saman á nýjan leik á þessu ári með tónleikahaldi í Bretlandi og Bandaríkjunum.

Á þessu ári verða þrjátíu ár liðin frá því að eitt vinsælasta lag sveitarinnar, Roxanne, kom út. Var það jafnframt fyrsta lagið sem vakti athygli á The Police í Bandaríkjunum. Hljómsveitin hætti störfum árið 1986.

„Við getum staðfest að það verður eitthvað sérstakt gert í tilefni af þessu en það er óákveðið hversu mikið hljómsveitin verður viðloðandi verkefnið,“ sagði á heimasíðu söngvarans Sting.

Til stendur að gefa út DVD-mynddisk með The Police á árinu auk þess sem safnbox með öllum hljóðversupptökum sveitarinnar og sjaldheyrðu efni er væntanlegt.

The Police, sem hætti störfum árið 1986, hefur tvisvar komið fram síðan þá. Fyrst var það í brúðkaupi Sting árið 1992 og síðan fyrir þremur árum þegar sveitin var innvígð í frægðarhöll rokksins.