The Peel Session - fjórar stjörnur

Breski útvarpsmaðurinn John Peel, sem féll frá fyrir rúmum tveimur árum, hefur sennilega haft meiri áhrif á tónlistarsöguna en nokkur annar fjölmiðlamaður a.m.k. síðustu 30 árin eða svo.

Eitt af því sem hann var þekktur fyrir voru Peel-sessjónirnar. Allt frá því að hann hóf störf hjá BBC árið 1967 og til dauðadags valdi hann tónlistarmenn sem tóku upp nokkur lög sem hann svo spilaði í þættinum sínum. Þessar upptökur urðu yfir 4.000 talsins og flytjendurnir um 2.000. Eftir því sem ég kemst næst urðu þrjár íslenskar hljómsveitir þess heiðurs aðnjótandi að taka upp fyrir John Peel: Sykurmolarnir (1987), Sigur Rós (tvisvar sinnum, árið 2000) og múm sem tók upp 21. september 2002. Hún er nýkomin út á geisladisk.

Á Peel Session-plötu múm eru fimm lög af tveimur fyrstu plötum sveitarinnar:  Yesterday Was Dramatic, Today Is OK og Finally We Are No One. Útsetningarnar eru töluvert ólíkar útsetningunum á plötunum, sem gefur útgáfunni aukið vægi. Tónlistin er mjög melódísk og á sinn einstaka hátt bæði poppuð og tilraunakennd. Raftónlist eldist mjög misvel – í verstu tilfellunum er hún orðin úrelt eftir eitt eða tvö ár. Tónlistin á þessari plötu hefur hins vegar ekkert látið á sjá frá því að hún var tekin upp. Hún hljómar ennþá jafn brakandi fersk og flott. Söngurinn er frekar lágt mixaður, sem kemur vel út fyrir múm.

Múm er búin að taka upp nýja plötu sem kemur út í vor. Ég er mjög spenntur að heyra hana. The Peel Session-platan styttir biðina og minnir okkur á hvað þetta er frábær hljómsveit þegar henni tekst vel upp.

Trausti Júlíusson