Gjörningaklúbburinn hannar fyrir umslag Bjarkar

Gjörningaklúbburinn hefur verið fengin til að hanna búninga fyrir umslagið á nýjustu plötu Bjarkar Guðmdunsdóttur. Þetta staðfesti Eirún Sigurðardóttir en hún skipar klúbbinn ásamt þeim Jóní Jónsdóttur og Sigrúnu Hróflsdóttur.

Eirún vildi lítið tjá sig um málið þegar Fréttablaðið náði tali af henni en sagði þó að stíllinn yrði í líkingu við það sem Björk er hvað þekktust fyrir. „Við verjumst allra frétt en lofum því þó að þetta á eftir að vera í takt við það sem Björk hefur verið að gera,“ segir listakonan. Hún tekur þó skýrt fram að þær komi ekki að myndatöku fyrir umslagið né hanni það. Einungis sé um að ræða kjólana.

Björk hefur verið þekkt fyrir að fara ótroðnar slóðir í klæðaburði og mörgum er það eflaust í fersku minni þegar hún mætti til leiks á Óskarsverðlaununum í svanakjólnum fræga árið 2001. Þá vakti kjóll hennar við setningu Ólympíuleikanna verðskuldaða athygli og ljóst að verkefnið hefur verið ærið fyrir Gjörningaklúbbinn.

Mikil spenna ríkir fyrir nýjustu plötu Bjarkar sem verður fyrsta hljóðversskífa hennar í þó nokkurn tíma. Á heimasíðu söngkonunnar á föstudaginn var síðan tilkynnt um nafnið og útgáfudag en hún ku heita Volta og kemur út sjöunda maí. Að sögn Einars Arnar Benediktssonar hjá Smekkleysu var farið mjög varlega í allar upplýsinagjöf á netinu og ekki gefin út nöfnin á lögunum af ótta við stuld frá sjóræningjaútgáfum.