Ghostigital flottir í Kaupmannahöfn

Hljómsveitin Ghostigital lék á tónleikum í Loppen í Kaupmannahöfn á föstudagskvöld. Vel var mætt á tónleikana, bæði af Dönum og Íslendingum sem búsettir eru í Danmörku.

„Ghostigital sýndu það og sönnuðu enn einu sinni að þeir eru frábært tónleikaband. Við höfum aldrei fengið jafn mikla athygli danskra fjölmiðla eins og fyrir þessa tónleika, sem er auðvitað frábært," segir Hjalti Már Einarsson, talsmaður íslenska tónleikafélagsins Beatless Propaganda í Kaupmannahöfn. Á föstudagskvöld léku Ghostigital á þeirra vegum á hinum fornfræga tónleikastað Loppen.

Danski dúettinn Snake and Jet's Amazing Bullit Band hitaði upp fyrir Ghostigital og virtust tónleikagestir skemmta sér konunglega. „Við virðumst vera með puttann á púlsinum á dönsku senunni því Snake and Jet's skrifuðu undir plötusamning við Crunchy Frog daginn fyrir tónleikana okkar. Þetta voru því fyrstu tónleikar þeirra undir þeirra merkjum," segir Hjalti Már.