Þrír rómantískir menn

Saxófónleikarinn Sigurður Flosason og píanóleikarinn Kjartan Valdemarsson halda tónleika með völdum sönglögum eftir Franz Schubert í eigin útsetningum í Laugarneskirkju kl. 16 í dag. Þar geta íbúar á höfuðborgarsvæðinu róað taugar sínar á kjördag og varið innilegri klukkustund með með þremur rómantískum karlmönnum: Kjartani, Sigurði og Franz.

Sönglög Schuberts og tveir djasstónlistarmenn er kannski ekki augljós samsetning. En hin rómantísku lög Schuberts innihalda þó allt sem spunamaður getur óskað sér í efnivið; þau eru hlaðin tilfinningum, hádramatísk og stútfull af áhugaverðum hljómrænum ferlum.

Hér er þó síst meiningin að „djassa“ Schubert með sveiflu og gangandi bassa.

Þvert á móti er hugmyndin að láta lögin njóta sín, oft í nær upprunalegu formi og spinna út frá þeim á sem fjölbreytilegastan máta; stundum byggt á stemningu lagsins, stundum á titli og texta og stundum á hljómagrind. Þetta er hvorki klassík né djass heldur tveir tónlistarmenn með fjölbreyttan bakgrunn að takast á við klassískan efnivið á nýjan hátt. Lögin eru valin úr hópi þekktustu stakra laga meistarans.

Dagskráin var frumflutt í Laugaborg í Eyjafirði sunnudaginn 6. maí síðastliðinn og hlaut frábærar undirtektir.