Aðsóknarmetið ekki slegið

KSÍ gerði sitt besta til að slá áhorfendamet á kvennalandsleik í gær. Alls mættu 1667 áhorfendur á Laugardalsvöllinn sem er nokkuð frá metinu sem er 2974 manns. Þrátt fyrir það skapaðist fín stemning á Laugardalsvelli í gær.

Greta Mjöll Samúelsdóttir vill þó fleiri á völlinn gegn Serbum á fimmtudag. „Ég vona að fólk fari að fatta hvað við erum góðar í fótbolta og drífi sig á völlinn á fimmtudaginn," sagði Greta og Margrét Lára Viðarsdóttir tók undir það. „Ég skora á fólk að mæta á fimmtudaginn. Við þurfum fleira fólk á völlinn. Ég vorkenni þeim sem mættu ekki í dag."