Silikonbrjóst í skiptum fyrir dónamyndir

Vefsíða sætir gagnrýni fyrir að notfæra sér neyð kvenna.

Bresk heilbrigðisyfirvöld hafa fordæmt vefsíðu sem hvetur konur til að safna peningum fyrir brjóstastækkunaraðgerð í skiptum fyrir eggjandi myndir, spjall við karla á rásum, gjafir og aðra þjónustu.

Vefsíðunni, sem er bandarísk, er ætlað að hjálpa konum sem ekki eiga peninga fyrir brjóstaaðgerð. Verða þær að vera minnst 18 ára og eru dónamyndirnar algjört skilyrði fyrir því að þær skrái sig á síðuna.

Á móti kemur að konurnar mega skýla sér á bak við dulnefni. Þannig greinir bresk kona, sem notar dulnefnið Morgan, frá því hvernig henni tókst að safna fyrir tæplega hálfrar milljónar króna brjóstastækkun, með aðstoð karlkyns „velgjörðarmanna“ sinna. En karlarnir þurfa allir að greiða fyrir aðgang að lokuðum svæðum á síðunni.

Breskir lýtalæknar hafa gengið hvað harðast í að gagnrýna vefsíðuna og segja hana siðlausa og lítillækkandi fyrir konurnar sem skrá sig á hana. Svo ekki sé talað um hversu afbakaða mynd þetta gefi af hinu langa og stranga ferli, sem fylgir ákvörðuninni um að fara í brjóstastækkun.-rve