Björgum Harry Potter

Í vikunni verður fimmta kvikmyndin um galdrastrákinn Harry Potter frumsýnd. Aðdáendur bókanna bíða hins vegar margir hverjir spenntari eftir sjöundu bókinni og vona heitt og innilega að Potter haldi lífi.

Vefsíða Waterstone-netbókaverslunarinnar hefur sett af stað undirskriftalista og biðlar þar til J.K Rowling um að gefa galdraunglingnum grið.

„Fyrst Bobby Ewing, Superman og Sherlock Holmes gátu allir risið upp frá dauðum þá getur hinn voldugi Potter gert slíkt hið sama. Það er að segja ef hann deyr,“ stendur á heimasíðu Waterstone. „Við viljum því með þessum undirskriftalista skora á Rowling að halda áfram að skrifa um ævintýri hans innan Hogwarts.“

Rowling hefur þegar lýst því yfir að hún hafi fellt tár við skriftir á sjöttu bókinni sem hefur verið gefið nafnið Harry Potter and the Deathly Hollows og gefið í skyn að annaðhvort Hermione, Ron eða Harry láti lífið. Samkvæmt vefsíðunni verða undirskriftirnar afhentar Bloomsbury-útgáfunni þegar einni milljón þátttakenda hefur verið náð. Daniel Radcliffe, sem leikur galdrastrákinn, hefur lýst því yfir að hann búist við því að hann eigi eftir að deyja. Og að hann verði jafnvel hálfsvekktur ef sú verður ekki raunin. Má þá reikna með að ófá tár renni niður kinnar ungra sem aldinna þegar slíkt verður fært upp á hvíta tjaldið að hætti kvikmyndanna.

En á meðan Potter-aðdáendur bíða upp á von og óvon eftir sjöundu bókinni hafa þeir huggað sig við Harry Potter og Fönixregluna en hún hefur slegið í gegn hvarvetna. Myndin var nýlega frumsýnd í London að viðstöddum aðalleikurunum og fékk afbragðsgóða dóma en þar glímir Potter við sjálfan Voldemort sem snýr aftur. Myndin verður frumsýnd á miðvikudaginn hér á landi og má reikna með löngum biðröðum fyrir framan kvikmyndahús borgarinnar.