Dansinn dunar

Simian Mobile Disco (SMD) er rafrænn dansdúett nafnanna James Ford og James Shaw. Þeir voru áður í kvintettinum Simian sem gerði lagið Never Be Alone sem seinna var endurhljóðblandað af Frökkunum í Justice. Varð þá til klúbbaslagarinn We Are Your Friends með Justice vs. Simian. Frá 2005 hafa SMD síðan verið að endurhljóðblanda urmul af lögum, til dæmis með Klaxons, The Rapture og Air við góðan orðstír.

SMD hafa einnig gefið út nokkrar smáskífur hjá franska plötu­fyrirtækinu Kitsuné sem er leiðandi í danstónlistarsenu heimsins nú um stundir ásamt Ed Banger (þar sem Justice er einmitt stærsta nafnið). Á Attack Decay Sustain Release er einmitt að finna þessar fyrri smáskífur sem hafa verið svo áberandi á dansgólfum skemmtistaða. Þvílíkt safn eitraðra hittara hefur því ekki komið út innan danstónlistarsenunnar í langan tíma.

Í raun er hvert einasta lag plötunnar til þess fallið að gera allt vitlaust á dansgólfinu og þau fara líka létt með það. Æsingslegir taktar, ótrúlega grípandi krókar og mínimalísk óhljóð eru flaggskip plötunnar. Oft bætast líka við einfaldir textar sem trufla mann ekki mikið og gefa lögunum oft aukna vídd. „I believe / you could be / what I need / to believe“ og „Love is all you need to know / and love is all you need / to know“ eru dæmi um passlega hnyttni.

Bestu lög plötunnar eru án nokkurs vafa It‘s the Beat (sem söngkona The Go! Team syngur) og Hustler. Tryllingslega góð lög. En eins og áður segir eru nær öll lögin hreinræktaðir klúbbahittarar. Undan­tekningarnar eru I Got This Down sem er viðvaningslegt fönklag og lokalagið Scott sem hefði mátt sleppa. Setjið samt bara þessa plötu á fóninn og þá þarf ekki lengur að hafa áhyggjur af partíinu.