Pólverjar sigruðu Slóvena og tryggðu efsta sætið

Slóvenar voru engin fyrirstaða fyrir sterkt lið Pólverja á HM í Þýskalandi í dag og svo fór að Pólverjar unnu 11 marka sigur, 38-27, og tryggðu sér þannig sigur í milliriðli 1. Þar með er endanlega ljóst að Ísland hafnar í þriðja sæti riðilsins og Frakkar í því fjórða, sama hvernig leikur þeirra gegn Túnisum fer í kvöld.

Króatar höfnuðu í efsta sæti milliriðils 2 og mæta því Frökkum í 8-liða úrslitum. Ef Danir vinna Tékka síðar í kvöld munu þeir mæta Íslendingum í 8-liða úrslitum. Spánverjar mæta þá gestgjöfum Þjóðverja og Pólland tekur á móti sigurvegaranum í leik Ungverja og Rússa í kvöld.