6th TransAtlantic Offroad Challenge aflýst

Tilkynning barst áðan inn á vef "Vélhjólaíþróttaklúbbsins" að það væri búið að aflýsa stærstu og vinsælustu endurokeppni Íslands.

Bréfið er svohljóðandi:

"Bölvanlegt að þurfa að tilkynna þetta. En því miður verður ekki keppt hérna á Klaustri í ár.

Menn spyrja eflaust um ástæðuna og skýringin er sú að ég hef bara ekkert land til að vinna með og það er víst algerlega ómissandi hluti í keppnishaldi sem þessu.

Ég þakka öllum þeim sem hafa komið að þessari keppni í þessi fimm ár sem ég hef staðið fyrir henni, jafnt starfsmönnum sem keppendum. Vona að þetta hafi vakið augu okkar hjólamanna að allt er hægt. "

Í framhaldi af þessari frétt ræddi fréttamaður við talsmann VÍK sem kom alveg af himnum og sagði m.a; "Hann hefur ekki rætt þetta neitt við okkur - við vissum að núverandi keppnisbraut væri líklega tæp en vorum byrjaðir að leita að nýrri staðsetningu í nágrenni Klausturs eða annars staðar á Suðurlandi. Þessi tilkynning er því algjörlega ótímabær."

Það mun væntanlega skýrast í þessum mánuði hvort eða hvar mótið verður haldið.