Skutu hunda sér til gamans

Verðir í búlgörskum almenningsgarði hafa valdið deilum meðal embættismanna eftir að þeir skutu hund rússnesks ræðismanns - af því að þeim leiddist.

Rússneski konsúllinn í borginni Russe í Búlgaríu krefst aðgerða eftir að labrador hundurinn hans, Mecho, var skotinn til bana af vörðunum, en þeir notuðu hann sem skotmark í hæfniskeppni.

Verðirnir voru ráðnir við gæslu í garðinum nálægt heimili konsúlsins, en hann var vanur að ganga með hundinn í garðinum.

Hundurinn slapp út úr sendiráðinu kvöldið örlagaríka og hljóp inn í garðinn.

Ræðismaðurinn Yuri Trushin sagði að hann hafi ekki tekið eftir hvarfi hundsins fyrr en næsta morgun. Þá fór hann út að leita og fann sundurskotinn skrokk hundsins í garðinum ásamt skrokkum fleiri hunda.

Trushin sagði að vitni hefðu séð verðina í garðinum "skemmta" sér við þá iðju að skjóta að hundunum kvöldið áður.

Hann sagðist hafa skrifað yfirvöldum í Russe og látið í ljós reiði sína, en hann hafi einnig hvatt Rússneska utanríkisráðuneytið til að grípa til aðgerða.