Ögrar ímyndunaraflinu

Sverrir Norland er tvítugur nemi við Háskóla Íslands og FÍH og situr jafnframt í ritstjórn vefsíðunnar dindill.is. Sverrir hlýtur að vera upptekinn ungur maður því ásamt þessu heldur hann úti vefsíðunni http://www.nyttljodahverjumdegi2007.blogspot.com/

Þar birtist daglega nýtt ljóð, ýmist bundið eða óhefðbundið, og mun svo verða áfram út árið. Sverrir segist vona að ljóðin tali bara sínu máli. Segir þau fjalla um allan fjandann, geta verið örstutt eða heilir bálkar, jafnvel dægurlög; sum fjalla um eitthvað merkilegt, önnur ekki. Annars finnst honum hæpið að segja til um hvað sé merkilegt og hvað ekki. "Meginkjarninn er sá að ljóðlist virðist vera eitthvað svo hátíðleg á Íslandi um þessar mundir, kvæði oft ótrúlega knöpp, köld, fjarlæg, minímalísk. Það er eins og hvert orð sé rifið beint úr hjarta skáldsins og tægjunum slett á blað. Og þá er ekki skrítið að ljóð verði stutt og kuldaleg".

Pælingin á bak við síðuna er sú að ögra ímyndunaraflinu Sverrir segist ekki sætta sig við hugmyndaleysi. Finnst ímyndunaraflið eitthvert hið stórfenglegasta fyrirbæri í heimi, finnst að fólk ætti sífellt að vinna að því að halda því við og útvíkka það.

En þetta er ekki allt því Sverrir gaf einnig út ljóðabók nú um jólin, Hún heitir Suss! Andagyðjan sefur og hefur hugsanlega að geyma eilítið fínslípaðri skrif vill hann meina. Sú bók er til í helstu bókabúðum Máls og menningar, Smekkleysu og Hljómalind, auk þess sem hann selur hana sjálfur, áhugasamir geta haft samband við Sverri á póstfangið: snorland@gmail.com, en hann segir bókina hræódýra, og kosta álíka mikið og skyndibita.