Birgir Leifur: Spennustigið verður hátt

Birgir Leifur Hafþórsson, atvinnukylfingur úr GKG, er í 7.-12. sæti fyrir lokahringinn á Opna ítalska mótinu sem fram fer á morgun. Hann verður væntanlega í þriðja síðasta holli og fer þá út um klukkan níu að íslenskum tíma. Hann lék á 67 höggum, eða 5 höggum undir pari, í dag eins og fyrsta hringinn á fimmtudag. Birgir er því samtals á 10 höggum undir pari og er aðeins fjórum höggum frá toppsætinu.

„Það verður alveg ný reynsla fyrir mig að vera í einu af 10 efstu sætunum fyrir lokahring á evrópsku mótaröðinni. Ég mun reyna að nýta mér það og spila til sóknar. Auðvitað verður spennustigið aðeins hærra fyrir bragðið, en ég held að það geti bara verið gott. Ég hef í sjálfum sér engu að tapa, en allt að vinna," sagði Birgir Leifur Hafþórsson í samtali við Kylfing.is eftir hringinn í dag.

Smelltu hér til að lesa allt viðtalið við Birgi Leif á Kylfingur.is