Jón Ólafsson með tónleika í Hafnarborg

Jón Ólafsson heldur tónleika í Hafnarborg föstudagskvöldið 8. júní kl. 21:00. Tónleikarnir eru hluti af Björtum dögum sem nú standa yfir í Hafnarfirði.

Á tónleikunum leikur sjónvarps- og tónlistarmaðurinn lög af geisladisknum Hagamelur sem hann sendi frá sér á dögunum. Þar er að finna lög og texta eftir Jón sem innblásin eru af lífinu sjálfu. Þetta er annar diskurinn sem hann sendir frá sér undir eigin nafni en sá fyrri kom út fyrir þremur árum. Á föstudagskvöldið gefst Hafnfirðingum og öðrum tækifæri á að berja Jón augum án aðstoðar sjónvarpstækis og heyra hann flytja lög sín og spjalla við áheyrendur eins og honum einum er lagið.

Miðasala verður við innganginn og er miðaverð 1500 kr.