Magnús Páll: Varalið Schalke minn fyrsti kostur

Magnús Páll Gunnarsson segir að hugur hans stefni til Þýskalands, nánar tiltekið til varaliðs þýska úrvalsdeildarliðsins Schalke.

Hann æfði með bæði varaliði Schalke og Borussia Dortmund í síðasta mánuði, sem og norska liðinu Haugesund.

„Mér leist gríðarlega vel á Schalke," sagði Magnús Páll við Vísi. „Ég tók þátt í æfingaleik með liðinu og stóð mig bara ágætlega. Mér var svo boðið í kjölfarið að koma aftur og æfa með liðinu í lengri tíma."

Magnús Páll mun á mánudaginn næstkomandi halda til Svíþjóðar þar sem hann mun æfa með 1. deildarliðnu Bunkeflo í nokkra daga áður en hann heldur til Þýskalands. Þar mun hann æfa með varaliði Schalke út nóvembermánuð.

„Hugur minn stefnir til Þýskalands. Ég sé mikið tækifæri í því að spila með varaliði Schalke. Mér líst ekkert illa á Svíþjóð en eins og er yrði það minn annar kostur."

Hann á einnig í viðræðum við lið í Landsbankadeildinni en hann segir að það sé ekki Breiðablik.

„Það verður alltaf ólíklegra að ég spili með Breiðabliki á næsta tímabili."